Хитойда охирги 10 йилда 76 мингдан ортиқ миллионерлар мамлакатни тарк этишган ёки бошқа давлат фуқаролигини қабул қилишган, деб ёзади Bloomberg нашри.
Манбада қайд қилинишича, хитойликлар муҳожир сифатида яшаш учун энг севимли жой сифатида Австралияни танлашмоқда. Фақатгина охирги икки йилнинг ўзида деярли 1400 нафар мамлакатдан чиқиб кетган хитойлик инвесторлар Австралияга виза масаласида мурожаат қилишган. Шунингдек хитойликларнинг нигоҳи АҚШ ва Буюк Британияга ҳам қаратилган.
Тадқиқотлар шуни кўрсатмоқдаки, хитойлик фуқаролар ўз компанияларини ривожлантириш ва жаҳон бозорига олиб чиқиш учун халқаро иқтисодиёт пойтахти сифатида қараладиган Нью-Йорк ва Лондонга кўчиб келишмоқда. 2014 йилнинг дастлабки ўн ойи ҳисоб-китобларига кўра, хитойликлар Британия бозорига 2 млн. фунтдан кам бўлмаган визали инвестиция киритган. Мамлакатга умумий инвестиция киритиб виза сўраган 703 нафар кишининг 300 нафари айнан Хитой фуқароларидир. Улардан кейинги ўринда бундай виза билан мурожаат қилган давлат сифатида Россия (160та ариза) қайд қилинган.
