АҚШнинг Альбукерке шаҳри полицияси ўрта оғир вазн тоифасида амалдаги UFC (Ultimate Fighting Championship – Мутлақ жангчилар чемпионати) чемпиони Жон Жонсни йўл-транспорт ҳодисаси жойини тарк этганликда гумон қилиб, қидирувга берди, деб хабар бермоқда NY Daily News нашри.
Воқеа 26 апрель куни содир бўлган. Спортчининг автомобили 20 ёшли ҳомиладор аёл бошқараётган машина билан тўқнашиб кетган. Жонс тўқнашув жойидан қочиб кетган, аёл эса кичик жароҳатлар билан шифохонага ётқазилган.
2012 йилда Жонс автомобилни маст ҳолатда бошқарганини тан олган эди. Ўшанда спортчи шартли жазо ва жарима билан қутилиб қолган эди.
23 майда Жонс ўзининг чемпионлик унвонини ҳимоя қилиш учун Энтони Жонсонга қарши жанг ўтказиши керак.
