2018 молия йилига келиб Windows 10 дастурий таъминоти ўрнатилган қурилмалар сони 1 млрд донадан ошиб кетади. Бу ҳақда Build 2015 конференцияси очилишида Microsoft корпорацияси президентининг операцион дастурлар бўйича ўринбосари Терри Майерсон баёнот берди. Эслатиб ўтамиз, 2018 молия йили компанияда 2017 йил июлидан бошланади. Рақобатчилар ҳақида гапирар экан, Майерсон компания мутахассислари Windows’ни тарихдаги энг кенг тарқалган платформага айлантириш борасида ишлаётганини таъкидлаб ўтди.

Apple компанияси яқинда сотувга чиқарилган “ақлли” соатларнинг нуқсони борлигини аниқлади. CNBC ресурсининг маълум қилишича, нуқсон соатларнинг энг асосий компонентларидан бири бўлмиш Taptic Engine вибромоторидан топилган. Бу вибромоторлар иккита компания томонидан етказиб берилади; қусур Хитойнинг AAC Technologies Holdings томонидан ишлаб чиқарилган моторлардан чиққани айтилмоқда. Бу ҳолат соатнинг янги бозорларга чиқарилишига тўсқинлик қилиши ва жараённи орқага суриши мумкин.