Rossiyalik bir qator taniqli shaxslar Ice Kefir Challenge deb nomlangan fleshmobda ishtirok etishni boshladi, deb xabar bermoqda “Tjournal.ru”.
Foto: tjournal.ru
Fleshmob ishtirokchilari o‘z ustida kefir quyib, buni suratga tushirishi va estafeta topshiriladigan keyingi uch kishining nomini aytishi zarur. Bu bilan tashkilotchilar uch yoshgacha bo‘lgan bolalarga bepul ozuqa taklif etuvchi “Sutli oshxona” ijtimoiy dasturiga e’tibor qaratishni rejalashtirayotgani aytilgan.
Hozirgacha aksiyada xonanda Aleksey Vorobyov, komediya artisti Yelena Vorobey, aktrisa Anastasiya Denisova, “StarXit” jurnali vakilalari va balerina Anastasiya Volochkova qatnashgan. Tegishli suratlar ostiga qoldirilgan izohlarda bu 1-aprel hazili ekanligi haqidagi taxmin ilgari surilgan, biroq bu boradagi dastlabki fotosurat 29-mart kuni chop etilgan.
Aksiya nomi va o‘tkazilish tartibi 2014-yilda ommalashib ketgan Ice Bucket Challenge fleshmobidan olingan. O‘shanda jahon darajasidagi yulduzlar va oddiy internet foydalanuvchilari o‘z ustilaridan sovuq suv quyib, xayriyadan tushadigan mablag‘ amiotrofik skleroz kasalligiga chalinganlarga sarflanishi aytilgan edi.
