Барселона" президенти Жозеп Бартомеу каталонияликлар бошқарувидан Луис Энрике кетган тақдирда "Реал" бош мураббийи Карло Анчелотти таклиф этилиши ҳақидаги хабарни инкор этди. "Анчелотти билан боғлиқ хабардан жуда жаҳлимиз чиқди. Бу хабар сафсата ва ёлғон Бундай хабарлар "Барселона"ни издан чиқариш учун тарқатилади. Бизда ҳеч қандай мураббийлар рўйхати йўқ. Биз фақат футболчи қидирмоқдамиз. Энрикенинг шартномаси бор ва Луис жамоада қолади. У ажойиб ишни амалга оширди. Янги шартнома имзоланадими? Бу ҳақида келажакда гаплашиб оламиз. Агарда Луис Энрике жамоамизда узоқ йиллар қолса, мен фақат хурсанд бўламан", - дейди мутасадди..

"Манчестер Юнайтед" клуби раҳбарияти "Бавария" ярим ҳимоячиси Бастиан Швайнштайгерни сотиб олиш масаласини кўриб чиқмоқда. Kicker нашрининг хабарига кўра, 30 ёшли футболчи билан "қизил иблислар"нинг устози Луи ван Галнинг шахсан ўзи қизиқмоқда. Бу билан голландиялик мутахассис майдон марказини кучайтиришни истаяпти. Швайнштайгернинг "Бавария" билан амалдаги шартномаси 2016 йилнинг июнида якунига етади. Унинг трансфер баҳоси 28 миллион еврони ташкил қилади. Бу мавсумда у 27та ўйинда майдонга тушиб, тўртта гол урган ва саккизта голли узатма берган.

Мадриднинг "Реал" клуби ҳужумчиси Криштиану Роналду клуб президенти Флорентино Перес билан учрашди. Учрашув давомида португалиялик футболчи бир неча масалаларни кўтарган. Роналду энг аввало қай даражада ҳаракат қилмасин ва жамоа ғалабаларига ҳисса қўшишга интилмасин, етарлича соврин қўлга киритилмаётганидан норози бўлган. Шунингдек "Атлетико"га қарши ўйиндаги мағлубиятдан сўнг (0:4) матбуотдаги танқидлар вақтида клуб уни ҳимоя қилмаганини ҳам айтиб ўтган. Роналду клуб президентидан "ғалабалар режаси"ни тузиб чиқишни талаб қилган. Маълум қилинишича, гарчи "ПСЖ"дан яхши таклиф бўлишига қарамай, португалиялик футболчи "Реал"да қолишни маъқул кўрмоқда.

Франциялик афсонавий футболчи Зайниддин Зидан Стивен Жеррард ҳақида илиқ фикр билдириб ўтди. "Жеррард - мен кўп ўйлаган фуболчилардан. Мен уни жуда қадрлайман. Ва бундай гапни мен ҳамма ҳақида ҳам айтавермайман. Нима учун у менга ёқади? Чунки мен унда ўзимни эслатадиган жиҳатларни кўрар эдим. У футбол майдонида шундай ишларни амалга оширардики, кейин майдон четида яна оддий одамга айланарди. У ҳеч қачон ўзини катта тутмаган. У билан бирга ўйнашни жуда ҳам истаган бўлардим. Аммо у ҳар доим ўз клубига - "Ливерпул"га содиқ қолган", - дейди Зидан.

Манчестер Юнайтед" клуби собиқ дарвозабони Петер Шмейхел Давид Де Хеа ҳақида фикрларини билдириб ўтди. "Менимча у ва унинг рафиқаси Мадридга қайтишни исташи аниқ. Шунингдек ҳеч ким "Реал" "МЮ"га ўхшаш буюк клуб эмас, дея олмайди. Ҳатто кимлардир мадридликларни буюкроқ деб билиши ҳам турган гап. Агарда Де Хеа кетишни истаса, унга раҳмат айтиш керак ва кетишига йўл қўйиш керак. "МЮ" - бир футболчи дегани эмас ва Де Хеа ҳам бутун бошли жамоа бўла олмайди", - дейди Шмейхел.

"Реал" ярим ҳимоячиси Гарет Бэйлнинг агенти Жонатан Барнетт клуб президенти Флорентино Перес билан учрашди. Хабар қилинишича, агент Перес билан суҳбатда агарда Бэйл сотувга қўйилган бўлса, бу ҳақида тезроқ хабар беришни сўраган. Бэйлнинг ўзи ҳам бу трансферга қарши эмаслиги айтилмоқда. Бу ҳақида As нашри хабар бериб ўтди. Ўз навбатида "Реал" томони шундай суҳбат бўлганини тасдиқлаган, аммо унда Бэйлнинг трансфери эмас, балки мавсум якунлари муҳокама қилингани таъкидланган.